Præceptum Karoli regis, quo fideli suo Acdeberto mansum cum ecclesia in honore sancti Andreæ in villa Vuiranda concedit.
In nomine sancte et individue Trinitatis. Karolus, gratia Dei rex. Regalis celsitudinis moris est fideles suos donis multiplicibus et honoribus ingentibus honorare ac sublimare. Proinde morem parentum regum predecessorum nostrorum sequentes, libuit celsitudini nostre quendam fidelem nostrum, Acdebertum nomine, de quibusdam rebus nostre proprietatis honorare, atque in ejus juris potestatem liberalitatis nostre gratia conferre. Iccirco
{corr: Idcirco} noverit experientia atque industria omnium fidelium nostrorum tam presentium quam futurorum, quia concedimus quasdam res juris nostri sitas in pago Matisconensi, in
villa quę dicitur Vuiranda, mansum unum cum capella in honori sancti Andreę; memoratum mansum cum omni integritate vel suis omnibus apendiciis, cum domibus ac edificiis seu mancipiis, terris, vineis, pratis, silvis, aquis aquarumve decursibus, vel etiam quantumcumque ad supradictum mansum juste ac legaliter pertinere videtur, predicto Acberto per hanc nostre auctoritatis conscriptionem concedimus, et de nostro jure in jus proprietario illius sollempni donatione transferimus; ideo videlicet ut quicquid ab hodierno die exinde pro sua utilitate atque commoditate jure proprietario facere decreverit, liberam ac firmissimam in omnibus habeat potestatem faciendi, tam donandi quam commutandi seu vendendi, necnon etiam heredibus relinquendi. Et ut hec nostre largitionis atque donationis auctoritas perpetuam obtineat firmitatem, manu nostra subterfirmavimus et anuli nostri impressione asignari jussimus. Signum Karoli, gloriosissimi regis. Jonas, diaconus, ad vicem Fludovvici, recognovi. Actum Rauciaco villa, regnante domno Karolo, gloriosissimo rege, in Dei nomine feliciter.